This post is also available in: English
Nòt editè a: Nan limyè evènman ki sot pase yo ki antoure plizyè douzèn fanm ki sove Prizon Fanm Cabaret a, atik sa a ekri pou Woy Magazine pa Ricardo Boucher, ofri kèk apèsi sou kondisyon fanm yo ap rankontre nan prizon sa a, evoke pawòl yo, ak reyalite a pou prizonye atravè peyi a.
N ap manifeste Pou n jwenn jistis Pou n al tribinal Gen nan nou ki gen Setan la Dizan la Ki pa janm pase devan jij Vle pa vle Yo dwe tande vwa nou tout Prizon pa dwe pwazon Prizon pa dwe lanfè N ap frape bawo N ap chante N ap danse N ap mande pou yo ban nou bon tretman (Powèm, yon fanm ki nan prizon fanm Kabarè)
Eske an Ayiti, prizon rive fè travay pote jistis bay viktim epi anpeche move zak repwodui? Kèlkeswa sèks ou, ou ka komèt yon zak ki deranje yon lòt moun, yon gwoup moun osnon lwa ak prensip ki tabli nan sosyete a. Se nan sans sa, aprè sistèm jidisyè a fin kondane yon move aksyon, yo mete anplas espas fizik ki rele prizon an, nan lide pou rann jistis ak moun ki te viktim nan epi pou pèmèt koupab la reflechi sou zak li te komèt la, aprè pou l kapab retounen nan kò sosyal la. San di petèt, prizon nan peyi Ayiti pa ranpli wòl sila yo pou plizyè rezon.
Aprè atelye pwezi nou te reyalize pandan yon mwa nan prizon sivil fanm kabarè nan kad rezidans Assosyasyon 4 Chemin te ofri, nou te obsève anpil bagay sou lavi fanm sa yo nan prizon sa a. Nan plizyè batbouch nou te gen ak anpil fanm sou kondisyon trètman yo, se te avèk anpil tristès, dezolasyon ak raj yo t ap mete deyò tout kalte move sitiyasyon y ap viv nan prizon an. Fòk nou di move sitiyasyon medam yo, pa sèlman nan Prizon Fanm Kabarè, li twouve l nan tout gadavi ak prizon, sitou nan penitansye nasyonal Ayiti.
Pami move tretman moun nan prizon ap viv isit nou ka site: agresyon seksyèl, absans swen sante, moun ki pil sou pil nan yon selil, pou yo dòmi se anba anpil goumen, moun ki gen plis pase dis lane ki pa janm pase devan jij ak vyolans polisye. Si n ta pran site move tretman yo, nou pa p fini.
Mwen fèmen nan yon prizon kote m pèdi tout mwen menm Mwen fèmen nan yon prizon kote m oblije sispann moun pou m viv Lè yo di m w ap bay li la Li kraze tout moral mwen Li fè m pèdi lespwa W ap bay li la Vle di W ap fè tout vi w la Vle di w gen dizan nan detansyon Sa vle di w gen pèn ak de chif (Sa se powèm yon lòt fanm nan prizon sivil fanm Kabarè)
Powèm sila esplike klè kou klèròz, kòman prizon nan peyi pa nou se yon lanfè, yon espas ki fèmen tout posiblite sou lavni moun pa bò isit.
Anplis, anpil nan moun ki rive jwenn liberasyon yo tounen gwo danje pou sosyete a, paske prizon se youn nan pi gwo laboratwa demounizasyon ak pwodiksyon kriminalite. Yo pa konsidere prizonye yo tankou moun nan move tretman tout kalte y ap ba yo ; depi sou jan yo ba yo manje, pou bout sou jan yo fè yo benyen. Sa k pi mal la, menm nan lanmò yo, prizon isit kontinye ak pwosesis demounizasyon an, nan sans prizonye a ka mouri, fanmi l pa gen kenn nouvèl epi leta menm pran kadav la l al jete l Titanyen.
Vire isit yon mi Vire lòt bò yon lòt mi Chak jou yon sèl kalte kouch penti Yon sèl kalte vwa chèf Prizonye Yon sèl kalte sant Sant manje moun pa ka manje Ti moun kou gran moun fèmen Menm ti bebe fèt tou fèmen Libète tout moun fèmen san siyifikasyon (Sa se powèm yon lòt fanm nan prizon sivil fanm Kabarè)
Sa vle di mete bon jan kondisyon pou l epanouyi l sou plan fizik ak moral.
Fòk yo mete l nan kondisyon moun, pou l pa konnen lè l ki te espas prizon an, li p ap toujou moun. Fèmen yon moun nan prizon, paske l vyole dwa lòt moun, pandan menm prizon sa kontinye nan lojik vyolasyon dwa moun nan, se kontinye menm vyolans lan.
Mwen fèmen Mwen ret bouch be Mwen fèmen Mwen pa konn ki lè Solèy leve Mwen fèmen dlo bouche tou de je m Mwen fèmen avni m kanpe devan pòt prizon an Mwen fèmen depi m te gen kenzan Jodi a m gen vennsenk (Sa se powèm yon lòt fanm nan prizon sivil fanm Kabarè)
